75
Tɑcɑɑ kɛlɛ hʋʋlʋ
1 Asɑfɩ yontu nti ɩ yoowɑ sɩ: Tɑɑ kʋ
nɑ tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, Ɩsɔ tə sɑmɑ-ŋ.
Tɑcɑɑ Ɩsɔ tə sɑmɑ-ŋ.
Tɩɩ yɔɣɔtɩ nyɑ́ tɔm nɑ
tə kpɑɑlɩ nyɑ́ teu sɔsɔɔm.
3 Tɑcɑɑ sɩ: Mɑɑ sɩɩ wɑɑtʋ nɔɣɔlʋ,
nɑ mɑ́ hʋʋnɑ siɣisuɣu.
4 Tɛtʋ nɑ tə tɑɑ nyəm tənɑ kɑ́ sele.
Amɑ mɑ́ sɩɩkənɑ-təɣɩ tə kilɑ tɔɔ.
5 Nɑ mɑ́ heeli mpɑ pɑ sɑŋ pɑ tɩ tɔ sɩ: Ɩ́ yele mpʋ,
nɑ ɑsɑɣɑɑ sɩ: Ɩ́ tɑɑ hɔ mə tɩ.
6 Ɩ́ tɑɑ hɔ mə tɩ,
ɩ́ tɑɑ yɔɣɔtɩ kɑlɑmpɑɑnɩ tɔm.
7 Sɔsɔɔntʋ ɩɩ kɔŋnɑ ilim təlɩɩlɛ yɑɑ pə tətʋlɛ,
yɑɑ wʋlɑɣɑ tɛtʋ tɑɑ.
8 Amɑ Ɩsɔ nyəmnɑ,
ɩ́ nɔkɑɑ ɩ kpɑɑsɩ lɛlʋ nɑ ɩ́ tisi lɛlʋ.
9 Tɑcɑɑ tɔkɑ kɔpʋ nɑ ɩ́ sunɑ ɩ pɑ́ɑ́nɑ́ sʋlʋm,
ɩ kɑ́ cɛ-wəɣɩ ɑtɛ ɑsɑɣɑɑ tənɑ,
nɑ pɑɑ nyɔɔ pə tənɑ nɑ pɑ́ kpɛŋnɑ tɑɣɑtʋ.
10 Mɑ kɑɑ yele Yɑkɔpʋ Ɩsɔ Tɔm yɔɣɔtʋɣʋ,
nɑ pə yontu yoou.
11 Mɑɑ yɔkɩ ɑsɑɣɑɑ toŋ tənɑ.
Amɑ tɑmpɑnɑ təŋlɑɑ toŋ kɑ pɩɩkənɑ.