8
Jisasame kaitinya anda etete epe dokonya pitisa kalai pilyamo
1 Naimame pii lelyamano dakenya tenge angi doko dapa: naimanya pitisa mupa dopale doko katao baa kaitinya Kiŋi Mupa dokonya petenge toko kingi tolae-kaita katapelyamo.
2 Baame Gotenya losuu anda seleme petae etete epe angi dokonya pitisa kalai pilyamo. Anda doko endakali mendeme pyaa naya-pyaa. Daa, Kamongo dokome pia-pyaa.
3 Pitisa mupa dupa pitakame opale mee maingi dupa minao Gote-kisa ipupala baa lao kundi tata tata dupa dina lao katena lea-pyaa. Dopa piamopa Jisasame opale kundi mende maipengeaka jia-pyaa.
4 Baa yuunya katapyali kandao doko, pitisa nakatapyali. Doko, mana setapae dupame lelyali pyoo opale Gote mee maingi tata tata dupa maingima pitisa dupa katapelyamino.
5 Losuu anda dakenya pitisa kalai pilyamino dupa kaitinya losuu anda dokonya makandepi imambupi joo pingima. Moseseme losuu anda mende seleme pyaanya piamo dokopa Goteme kyoto joo baa lamaiyoo, “Dupa pitaka nambame emba yuu manda dokonya makande laitaka pioli pyoo, etete kapa pena lao kandao pipi,” lea-pyaa.
6 Dopaka doko, Kataisame pitisa kalai piamo dokome pitisa waka dupame kalai piamino dupa etete ita minia-pyaa. Dopaka pyoo Kataisame Gotepa endakalipanya kainanya pii lao seteamo dokome pii lao setapae wambatae doko etete ita minia-pyaa. Doko, Goteme pitona latae pii etete epe dokome pitona latae pii wambatae doko ita minilyamo doko pii lao setapae dokonya tenge.
Pii lao setapae enenge dokome wambatae doko ita minilyamo
7 Wamba tee pyao pii lao setapae doko kopeta nanjiali kandao doko, Goteme paa lapo pyoo pii lao setato lao masala nayali.
8 Dopaka doko, Goteme endakali dupa-kisa koo tenge sianya baame lao pituu,
“Namba Kamongo dokome lelyona,
‘Salapa! Tenda gii mendepa nambame Isataele dupapi Juta dupapi dupanya pii enenge lao setakamaito.
9 Pii lao setapae enenge doko wamba nambame dupanya yumbange dupa-pipa pii lao seteo dopale daa.
Wamba nambame Isipe yuu doko yakinalanya dupa kii minao lanyoo peo dokopa dupanya yumbange dupa-pipa pii lao seteo doko dupame watao minala nayami.
Dopa piamino dokonya nambame dupa masala nayona,’ namba Kamongo dokome dopa lelyo.
10 Deaka nambame lao pituu,
‘Gii dutupa etapatamopa maitakao nambame Isataele dupanya pii waka mende dapa lao lao setakamaito:
nambanya mana setapae dupa dupanya masingi koko dupanya setapakamaitala monanya pepa pyaanya katakamaito.
Dokopa namba dupanya Gote katatopa dupa nambanya endakali katatami.
11 Dokopa endakali pitaka mendai mendai lao dupame dupanya pii mendai lengepi kaiminingipi dupa mana lamaiyoaka nakatenya lao pituu,
“Embame Kamongo lao masepengena,” laa nayatami.
Daa, gii dokopa endakali angipi kolepi dupa pitakame namba lao masokondape pitami.
12 Mana setapae dupa dupame angotaminopa nambame dupa kondo kayapala dupanya koo dupa lao dee masala nayatona,’ ” Kamongo dokome dopa lea-pyaa.
13 Baame pii enenge lao seteamo dokome pii tee pyao seteamo doko atingi injisetea-pyaa. Opale atingi jetala koelyamo doko etalakao etalanya pingi.