9
Pitisa mupa wamba kateami dupame pulumakao akipi taiyokome kundi maiyoo kateamino doko
1 Pii lao setapae wambatae dokonya mana mendapua losuu lapengepi yuunya anda etete epe dokonya lawapi lao setea-pyaa.
2 Losuu anda seleme piamino dokonya lamapi, tokopi, betesa Gotenyana lao setengema dupapi dutupa singi-pyaa. Sele anda doko kandao etete epe lengema-pyaa.
3 Lapalapa andake mendeme kaina dokonya kame joo yukuotala lapalapa dokonya maitakaita dokaita palo eteteaka epena lengema-pyaa.
4 Kena tunduma pina lao yangalanya olata toko golome wasepae dokopa Gotenya pii lao setapae palenge bokosa dokopa dolapo palo dokonya singi-pyaa. Bokosa doko pitaka golome sanga pyatae-pyaa. Bokosa dokonya sisopene penge golome wasepae nee manaa paleta doko palenge-pyaa. Etonenya pangali wamba imbu pyoo yoko piamo dokopi Goteme pii lao setapae kana lapomanya pepa piamo dolapopi dutupa bokosa dokonya palengeaka-pyaa.
5 Bokosa ketae dokonya Gotenya tii pipae doko makande pyoo enjele lapoma wasepae-pyaa. Pundipundi dolaponya koo kunalanya taiyoko kai lengema panda singi-pyaa. Dopaka doko, indupa opale kuki dupanya nambame pii lao panala nayato.
6 Dopa pyoo dopale dupa waseteamino dokopa pitisa dupame koteaka lao losuu anda seleme petae dokonya kolandao nyakamanya pipenge dupa pingima-pyaa.
7 Dokopa pitisa mupa dokome iki palo eteteaka epe dokonya ee kana dii lao paa mendai kolandata pingi-pyaa. Baa mee kolandala nayao taiyoko dupa nyepala kolandata pingi-pyaa. Dokopa taiyoko dupame baa tangenyapi dee endakali dupame koo pilyamano lao masala nayao koo pilyamino dupanyapi koo kunina lao kundi maiya pengema-pyaa.
8 Mana dokonya Oli Sipitisame naima dapa lao laitaka pilyamo: losuu anda seleme petae dokonya kalai doko mee setamoaka kandao doko, palo eteteaka epe dokonya endakali kolandapenge kaitini doko lumbala nayatana lao laitaka pilyamo.
9 Losuu anda seleme petae doko indupa gii dake makande petae. Anda dokonya Gote mee maingi tata tata dupa maitala baa lao kundi tata dupa maingima-pyaa. Dopa pingimaka doko, dopale dutupa pitakame kapa pao tama pilyamino endakali dupanya ingi monapi minao etete auu pisala naenge-pyaa.
10 Kundi maingi tata dutupa neepi, endakipi, opale wasawasa pingipi dopale yongenya mana setapaenya iki-pyaa. Goteme mana seteamo dutupa pitaka endakalimi watao minao pao baame dupa pitaka tolasetamo gii dokonya tuu lena lao setea-pyaa.
Kataisa baa tangenya taiyokome kundi maiyamo doko
11 Dopaka doko, indupa Kataisa baa ipupala mana epe sakatasiamo dupanya pitisa mupa katapelyamo. Losuu anda seleme petae wambatae doko ita minao losuu anda seleme petae etete auu pipae dokonya baa kolandatea. Anda doko endakali kingimi petae yuu dakenya mende, daa.
12 Baame paa mendai iki losuu anda seleme petae etete epe dokonya kolandatala, koteaka lao pyoo nyepae katataminopa lao naima pyoo nyia-pyaa. Baame memepi pulumakao yakanepi dupanya taiyokome dopa pia daa. Baa tangenya taiyoko dokome dopa pia-pyaa.
13 Pitisa dupame endakali Gotenya enombasa koelyamino dupa-kisa meme tamopi pulumakao maipa tamopi dupanya taiyoko dupame dupa tandinya piseta, pulumakao ina puiyoto itatenya yangao kenai jetae dupame dupa lumbanya piseta pingima-pyaa. Dopa pilyaminopa endakali koyapae dupa Gotenya enombasa etete epe jetala dee auu petae jingima-pyaa.
14 Dopa pingimaka doko, Kataisanya taiyoko dokome dupa ita minia-pyaa. Kataisa baa-kisa koo mende etete nasingi. Katawaka katenge Sipitisanya pupu lapae dokome baa tange kundi joo Gote maiya-pyaa. Dopa piamo dokome Gote lete katenge dokonya kalai pyakamaiyapale lao naimanya ingi monapinya mana koo tenge dupa yukuoo nepekea-pyaa.
Kataisanya taiyoko dokome pii enenge lao setapae pupu lasiamo doko
15 Dopa piamo dokonya Kataisame Gotepa endakalipanya kaina dokonya pii enenge lao setea-pyaa. Pii lao setapae wambatae doko siamo gii dokopa koo piamino endakali dupa pitaka dee sambao nyoto latala baa kumatea-pyaa. Goteme wii latae endakali dupame nyetami leamoli pyoo lete etete katenge doko nyetami.
16 Akali mendeme baanya moya dupa mokosetoo latamo kandao doko, moya dupa endakalimi nyina lao baa wambao kumapenge.
17 Akali doko wambao kumapelyamo dokopa baanya moya mokoseto lelyamo pii doko angi jingi. Baa lenge tao katawaka pituu baanya moya dupa mokosetoo lelyamo kandao doko, baanya pii doko angi jala naenge.
18 Tenge dokonya minao taiyoko dupame pii lao setapae wambatae doko pupu lasingima-pyaa.
19-20 Wambao Moseseme endakali dupa pitaka mana setapaenya pii dupa pitaka lamaiya-pyaa. Maitakao pulumakao yakane taiyokopi, meme taiyokopi, endakipi dupa nyepala sipisipi kangyoo itipi, elyamuni yokopi, dupame tandyoo bukupi endakalipi dupa pitaka-kisa pisoo pituu, “Taiyoko dokome pii lao setapae nyakamame watao minalapale lao Goteme langiamo doko pupu lasilyamona,” lea-pyaa.
21 Dopaka pyoo Moseseme taiyoko dupa losuu anda seleme petaepi disapi opale minao losuu lengema dupa pitakanya tandyoo pisia-pyaa.
22 Kini, mana setapae dupame lengeli pyoo taiyoko dokome opale dupa pitaka auu pisingiaka doko, mendeme mendatupa auu pisingi. Taiyoko mende naepelyamo kandao doko, Goteme endakalinya koo kunao nepakamaiya naenge-pyaa.
23 Pitisa dupame kaitinya singi dutupanya makande iki petae dupa auu pisalanya kundi maingi mana dutupaka minapenge jia-pyaa. Dopaka doko, kundi dupa ita minao kundi etete epe dokome iki kapa pao kaitinya singi dupa auu pisingi.
24 Jisasa baa Gotenya anda angi dokonya iki waingi tao endakali kingimi petae etete epe dokonya kolandala naya-pyaa. Daa, baa kaitinyaka tolao kolandatala indupa baa Gotenya enombasa panatala naima nisoaka kalyamo.
25 Ee kana dii lao pitisa mupa dokome palo eteteaka epe dokonya Gote lao kundi maiya pao pituu baanya taiyoko doko minao paa naenge-pyaa. Dopaka doko, Kaitaisame baa tange paa longosa kundi maiya naya-pyaa.
26 Baame paa longosa kundi maiyali kandao doko, Goteme yuupi kaitipi wasiamo dokonya pituu indupa tuu lao baa paa longo tanda nao katapyali. Dopaka doko, gii etalanya piamopa Kataisame baa tange Gote lao kundi maitala endakali dupanya koo kunanya nepakamaitopa lao paa mendai iki baa yuunya epea-pyaa.
27 Endakali dupa paa mendai iki kumapelyaminopa maitakao Goteme yapenge.
28 Dopaka pyoo Kataisame endakali dupanya koo kunakamaiyoo paa mendai iki baa tange Gote lao kundi maiya-pyaa. Tenda baa paa lapo pyoo ipata. Dopaka doko, baame koo kunalanya ipata daa. Kataisa kandatapuma laka lao putiti kayao malisoo katenge dupa etete pyoo nyalanya ipata.