2
Hay Nunluwaluan Jonah
1 Ya hidin wadan Jonah hi putun nan ekan ya nunluwalun Apo Dios an dayawonan
2 inalinay,
“Nan punligligata' ya wa ay ta munluwalua' ay He"a, Apo Dios, ya dengngolmu,
ya hidin paddungnay awada' hinan maluhung an lubu' ya dengngolmu.
3 Ya impipa'bawa' ay He"ah nan maluhung,
ya nunlononga' hi bunol nan baybay,
ya gunna' punhinnigiyon hinan dalluyun.
4 Ya alyo' hi unna' inyadagwin He"a ta adi da'a tigon,
mu hemmo'a' ay He"a ta mabalin an tigo' goh nan me'gonan an Timplum.
5 Ya hene'noba' hinan danum ta linumnonga' hi ad dolom,
at linibutana' hi holo' hinan baybay.
6 Ya immuya' hinan bunol di baybay hinan puun di aduntuduntug an nahe'nob,
ya alyo' di mid mapto' ya munnanonga' hidih nan lugal
an adi ahan mabalin an mibughul di pantawna!
Mu He"a, O Apo Dios an dayawo', di nummahun ha"in ta timmagua'!
7 Ya unat goh magadyuh an matoya' ya ninomnom'u He"a, Apo Dios, at nunluwalua' ay He"a,
ya dengngolmuh nan way awadam hinan me'gonan an Timplum.
8 Mu nan man'ug ay He"a an nan mundayaw hi bulul an mi'id ahan di hulbina
ya adida mumpahmo' ay He"a an ta"on hi unmu pa'ahhom'on dida.
9 Mu ha"in ya He"ay pangikantaa' hinan pundayaw'u,
ya pangiyalia' hi e'nong'u ta ipa'annung'u nan intulag'un He"a
ti He"a ya anggay di alpuwan di pi'taguan.”
10 At hi Apo Dios ya minandalna din ongol an ekan ta umuyna utaon hi Jonah hinan pingit di baybay. At na'at.