14
A Yicu uꞌriyi guru nono
1 A gomon geꞌte ganni giru Kwoꞌra täꞌrïl, a Yicu ele ngwuꞌdun ngwudi gur giru giꞌra gidi Ngwübärrïjï yïrnü a ngwüjï ji ndi iye ngwäy ngwe.
2 A gur ji gändälü ngwangina nono ngwujicalu gweere.
3 A Yicu otaci ngwortalu ngwudi yobo na Ngwübärrïjï ngwuje ci, “Yijaw ndi apada dïjü yiima gomon ganni giru Kwoꞌra täꞌrïl gwalla yaꞌti jaw?”
4 Aar be gwugundi. A Yicu apada dïjü ndoo yiima ngwugeꞌte kay ngwele.
5 Ngwuje be ci, “Manari nga nga lima ätï gïjü na gïndrï gïꞌdü gidel komon giru Kwoꞌra täꞌrïl, gaꞌti ga aang gwalla puprango?”
6 Aar ꞌti ätï ngwujaꞌri ngwere ngwadi aar ngwe ci.
Yïrnü na okeye ligoꞌro
7 A je be Yicu mïꞌrïcï ngwujaꞌri ngwee anaku änggädïng gu ngwüjü awa ngwutu ngwaalinga gwudi jalu yïrnü ati aar ele aar jalu ngwuduꞌrala ngwudi ngwüjï ngwanni ngwupa ngwujalu kiꞌra gweere.
8 Ngwuje ci, “Ma ara je urnidi gïyïꞌrïnyïnä yidi giꞌtidi kay, aaꞌti nga gwele gwa jalu gididuꞌrala danni dïjädï kiꞌra gweere ngwaalu ngwudi yeleny nda manari dïjï ndo dïndï gwodan danni dipana ꞌdunggunga
9 a be gwanni gwurnida je gwa be ila gwa ang ci, ‘ꞌDïꞌrïjä guralu nggee ngwujalu.’ No a gwa be ꞌdonggalu gwanni gwapu yaaru a gwa jalu gwodan.
10 A be manari lima ang urnidi ngwaalu ngwudi yïꞌrïnyïnä, ati ang ele nga jalu gwodan ma be ari dïjï danni durnidanga dima ila ma aar ang mbuji da ang be ci, ‘Dimad, ꞌdïꞌrä ang jalu kiꞌra gweere ngwaalu ngwujaw.’ Nga gwa be näjïnï ngwäyänü ngwüjï ꞌdar ngwanni ngwujalu ngwuru ngwürnü.
11 Ndi ari dïjï danni dati oleye ligoꞌrala lüngün dati aar ülläjälü na dïjï danni dati okeye ligoꞌro lüngün diru danni dati aar oleyala.”
12 Ngwube ci dïjü danni durnida nu, “Manari nga gwuma geꞌte yïrnü yaa yïꞌrïnyïnä, aaꞌti be nga gwa urnidi ngwumaada ngwunga na ngwanggalu na ngwüjï ngwunga na ngwüjï ngwanni ngwujacida ngwe, ngwanni ngwuru ngweleny ngwätï yelenya yonyadu. Manari ngwuma je urnidi, ngwa mine aji ꞌto ngwa ang urnidi anaku urnida je gu no a gwa gwäꞌrïnï.
13 A be manari nga gwuma geꞌte yïꞌrïnyïnä, urnida ngwuwaya, nga urnidi ngwumjo, nga urnidi ngwurga na ngwüjï ngwanni ngwürïmü ngwäy.
14 La ang be onjaci ma ang ꞌti gwäꞌrïnänü ꞌdenggen, a gwa gwäꞌrïnï komon gidi ꞌdïꞌrï gwudi ngwüjï ngwanni ngwüdünälü.”
A Yicu mïꞌrï ngwujaꞌri ngwani yïꞌrïnyïnä yanni yipa
(Mätä 22.1–10)
15 Anni ma gu dïjï deꞌte ngwüjänü gïdïmbürälü ꞌdingina no, ngwula ngwuci Yicung, “Yadi gu jayi kang gïdïjï danni dadi jalu ndi eny gïdïmbürälä giyelenyanu yidi Ngwaalu.”
16 A be Yicu mïꞌrïcï ngwujaꞌri ndi ari, “Dïjï deꞌte digeꞌta yïꞌrïnyïnä yipa ngwube urnidi ngwüjü ngwonyadu.
17 Kaji gidi yïꞌrïnyïnä ngwube ükäjï ngwïnädä ngwüngün ndi urnida ngwüjü ngwanni ngwabingacaar je ndi ari, ‘Ilar yiꞌral ꞌdar yima be ji mama.’
18 Aar be määtä ꞌdar anaku rar gu aar ari lätï yiiru laꞌti la burni ndi ila. A deꞌte ari, ‘Äny gwïllï dïyängü gweneno dadi nyi ele ndi ombaja gäbïcïny.’
19 A gweꞌte mana ari, ‘Äny gwïllï yindri yiꞌra ꞌdï yadi nyi ye ele ndi gwürlï dïyängänü gweneno yadi nje ele ndi ïdäjä. Gäbïcïny nggwaꞌti gwa burni ndi ila.’
20 Na dïjï deꞌte ari, ‘Äny gwagu girem, nggwaꞌti gwa burni ndi ila.’
21 A dïnäd kwodalu ngwondaci delenya düngün. A deleny kanu ngwuci, ‘ꞌTüdï puprang ang ele ngwayalu na ngwumooꞌralu ngwudi gündär ang urnida ngwuwaya na ngwumjo, na ngwüjï ngwanni ngwürïmü ngwäy na ngwurga.’
22 A dïnäd ꞌtü ngwurnida ngwüjü ngwube ila ngwuci, ‘Gwani deleny yanni yara ye yima ärrïnï ngwaalu ngwo na be ngwoko ngwudayinalu.’
23 A deleny ci dïnädä düngün, ‘ꞌTüdï ang urnida ngwüjü yiima ye ngwayalu na giyiꞌdongalu ꞌdi a ngwuꞌdun ngwüny onyadala gïdrü.
24 Nggwa je ci gwere gwaꞌti gwanni gwondaciny gwa ngille ngwony ngwudi yïꞌrïnyïnä yüny aꞌtur.’ ”
Guꞌru gidi dooꞌra didi Yicu
(Mätä 10.37–38)
25 Ngwüjï ngwonyadu ngwïndäär Yicunga le, ngwugwurlalu ngwuje ci,
26 “Manari dïjï dere dima ila ꞌdünggüny ma aar nyi ꞌti be ämnänä ndi papa gwüngün na nanni gwüngün na daw düngün na yïjü yüngün na ngwenggen ngwanni ngwuru ngwur na ngwanni yera na ligoꞌro lüngün, daꞌti da ru dooꞌra düny.
27 Gwanni gwuma ꞌti ämnä ndi ape yiꞌrendenya yidi yiꞌrany yani äny, gwaꞌti gwa burni ndi ru dooꞌra düny.
28 Manari dïjï dima mïnï ndi oda ngwuꞌduna ngwanni ngwolala, dati jalu gwerre gwerre ngwïꞌrä ngwony ngwanni ngwudi ngwe oda ndi ari mung oda, ngwa mbute?
29 Nunnu aaꞌti gwa gatu yidingo ngwong ngwa be üꞌrätï kay gwa be ngwüjï ärï ngwïmä ngwanni ngwadi engga ngwuꞌduna ngwodana ngwüꞌränü.
30 La ari, ‘Dïjï ndee düdädï dima be amiꞌrati ndi medaji ngwuꞌduna ngwüngün.’
31 A deleny dïndï ne dïmïnä ndi ele gïyäärä, ngwuꞌti be jalu gwerre gwerre ngwutalu ndi ari gwätï gwuꞌtulung gwuru ngwüüꞌrï ꞌdï (10,000) gwa aar dugidi deleny de danni dätï gwuꞌtulung gwonyadana ndi gwuꞌtulu ngwüngün gwuru ngwüüꞌrï küüꞌrï (20,000).
32 Manari dima ïcïnänü ndi ari gwaꞌti ätï yiima, dükäjïdï gideleny ndoo danni ndona kay golanu ndi ari aar jalu aar adatalu.
33 No ꞌto manari nga nga ꞌdar, dïjï dima ꞌti gatana ngwonyalu ꞌdar ngwanni ngwätïng je, daꞌti da ru dooꞌra düny.
34 Ngwümündä ngwujaw, ma be ari ngwuma dudiyi nyiring gwüngün ngwa aar je nyiriyi mana?
35 Ngwaꞌti ngwa jayi ndi ari ngwe nyiriyi dïyäng na ndi aar je bäläjï kürü, ngwa bälänälü mbüny. Dïjï danni dätï ngwänï rom ngwudi ꞌdingini ngwuꞌdingini.”