15
Mïꞌrï ngwujaꞌri ngwani dangal danni didudu
(Mätä 18.12–14)
1 Gomon geꞌte anni ma ngwudulba ngwonyadu ngindenga le lanni liki ilada ndi Yicu ndi ꞌdingini ꞌdünggüngün,
2 a be Ngwübärrïjï na ngwoorta ngwudi yobo gwurli aar äbïngïnï giyenenanu aar ari, “Gur giru ange nggee gati aar ele ngwüjü ngwanni ngwuki ꞌdi ati aar ngwe emadi kiny geꞌte pu!”
3 A je be Yicu mïꞌrïcï ngwujaꞌri ngwee ngwari,
4 “Yärü gwere ꞌdanggalu gwätï ngwangala küüꞌrï tudini (100) ngwube dudi deꞌte. Gwadi ärrï ange? Ngwaꞌti ngwung je gatani ngwoo ngwuru ꞌdï tudini kwoꞌrongo na tudini kwoꞌrongo (99) gidaamalu ngwele nding mïnä ndoo dima dudi ꞌdi ngwumbuja?
5 Mung mbuja, ding apa ding geꞌta gidrom gwujayanu
6 mung oꞌre ꞌdunu gwa be urnidi ngwumaada ngwüngün na ngwüjï ngwanni ngwucajidaar ngwe ling je ci, ‘Äny nggwo gwujayanu gwulleny anaku minyi gu mbuja dangala düny danni didudu. Ilar aar eny aar jayanu!’
7 Anaku no, nggwa je ci, jayanu gwa ji gwupana kerala gwani dïjï deꞌte pu danni diki danni dati joꞌrenyana giyiꞌral yanni yiki ngwüjänü ngwanni ngwuru ꞌdï tudini kwoꞌrongo na tudini kwoꞌrongo ngwanni ngwüdünälü ngwanni ngwaꞌti ätï ndi joꞌrenyana.”
Mïꞌrï ngwujaꞌri ngwani bartad gwanni gwududu
8 “A nono dayu danni dätï dinar ꞌdï ngwube miꞌrajalu deꞌte. Dadi ärrï ange? Da ulli lamba da bruti ngwuꞌdunalu ngwüngün ding mïnälü ꞌdar minyol ꞌdi ngwumbuja.
9 Mung mbuja, da urnida ngwumaada ngwüngün na ngwüjï ngwanni ngwucajidaar ngwe ngwuje ci, ‘Äny nggwo gwujayanu gwulleny anaku minyi gu mbuja dinar düny danni dimiꞌrajinyalu. Ilar aar eny aar jayanu.’
10 Anaku no, nggwa je ci, yïꞌrr yidi Ngwaalu kerala ya jayanu gwani dïjï deꞌte pu danni diki danni dati joꞌrenyana.”
Mïꞌrï ngwujaꞌri kïjï ganni gidudu
11 A Yicu oda yiꞌral ngwuje ci, “Gomon geꞌte gwerre gur geꞌte giju gätï yïjü rom.
12 A be ganni gokana ꞌdïꞌrï ngwuci papa gwüngün nu, ‘Papa, ila be nyi ätädä guꞌru güny gidi goola gunga.’ No a je papa gïnätïjï golanu güngün gwenggen gwe gwanni gwupana.
13 Yomon cong a gïjï nggoo gokana ellang gola güngün ngwape ngwilinya ngwüngün ngwüꞌdïꞌrï ngwugatani ngwuꞌduna. Ngwele ken gola ngwaalinganu, ngenone ngwugeraji yuꞌrinalu yüngün elelle gwe gwanni gwuki.
14 Anni mung dudiyi yuꞌrina ꞌdar yanni yätïng je, a be ngwamu ji ngwupa aar määtä geno nggoo ꞌdar a nginde jalu ngwuru diwayi.
15 Ngwele ngwacaji dïjänü deꞌte didi gen nggoo ngwudinga ngwaartanu ngwüngün ndi iye ngwüdrä.
16 Ati ngwüꞌrïny amiꞌranu ngwanni ngwati je ngwüdr eny, ati ꞌti dïjï ju dere ndi ätä.
17 Gäꞌtï gänü ngwudiwayina ngwari, ‘Ngwïnäd ngwudi papa gwüny ngwonyadu ngwati eny ꞌdi aar pe aar gwäꞌrï, nyi be ayi ngwamu ngene!
18 Nggwa ꞌdïꞌrï nggwa oꞌre ndi papa gwüny gwuny ci, Papa, äny gwuma ke ngwäyänü Ngwaalu na ꞌdunggunga,
19 äny gwaꞌti ba be ädï ndi ru gïjï gunga rujiny nono dïnäd deꞌte dunga.’
20 Ngwüꞌdïꞌrä ngwoꞌra ndi papa gwüngün.
A papa gwüngün engga ndi ila ꞌtuꞌtu ngenone, ngwïnä, ngwabrada nono, ngwagu püm ngwaganni giyenenanu ngwümätänï nono.
21 A gïjï ci, ‘Papa, äny nggwee gwuma ke ngwäyänü Ngwaalu na ꞌdunggunga, äny gwaꞌti ba be ädï ndi ru gïjï gunga.’
22 A be papa ondaci ngwïnädä ngwüngün ngwuje ci, ‘Apar direda puprang dele dijaw ngaa giki, ngaa ülläcï guꞌrunga komon ngaa giki ngwüdänü giyora yüngün.
23 Ngaa apa gimꞌru ganni gikwudina ngaa dugi aar eny aar jayanu.
24 Ndi ari gïjï nggee güny gayu, gima be mida mana. Gidudu, gima be mbüjïnä.’ A no aar eny aar jayanu.
25 Gaji ge nggoo gwenggen gwanni gwupana gwuju gïtäny. Ngwoꞌra anni ma ngwila gito gito ꞌdunu, ngwuꞌdingina ngwüjü ngwelnga aar riti.
26 No ngwurnida dïnädä deꞌte ngwotacalu, ‘Yiru ange giyo?’
27 A dïnäd ci nu, ‘Gwanggalu gwuma oꞌra ꞌdunu gwuma be papa gwunga dügïjï gimꞌru ganni gikwudina nunnu gima oꞌra gijaw nono.’
28 A güündä ape gwenggen nggwo gwupana ngwuꞌdonya ndi änï gïdrü. No a papa gwüngün ꞌtüdä ngwüpäcälü ndi änï gïdrü.
29 Ngwube ci papang gwüngün nu, ‘Diwayina ngwüdläyü ngwanni ngwäpïjä ngwe yiiru nono minyi ru dïnäd, nga ꞌti nyürtïjänü giyiꞌral yere aꞌtur. Nyi ꞌti ätädï gaaꞌri gere nyi dugi nyii jayanu ngwumaad ngwe ngwüny.
30 A be anni ma gïjï gunga nggee oꞌra ꞌdunu ganni gïtär ngwedr ngwe gola gunga, nga be dügïjï gimꞌru ganni gikwudina!’
31 A be papa ci, ‘Gwani gïjï güny, nda ati ji yomon ꞌdar, goola ꞌdar güny gunga giru.
32 A be yädï gu ndi ar eny ar jayanu, ndi ari gwanggalu nggwee gwayu gwele gwuma be mida, gwududu gwele gwuma be mbüjïnä!’ ”