16
Dartan danni diru dïrïgïnä
1 A Yicu ondaci ngwoꞌra ngwüngün ngwuje ci, “Dïjï deꞌte diru deleny dätï ngwony ngwonyadu ngwube ape dartana ating je ombaci. A määtä a ngwüjï ondaci ndi ari gwati dartan düngün düdïyïjï ngwony yïrgïnä.
2 A määtä a deleny urnidi gïdrü ngwotacalu ngwuci, ‘Yiru ange yanni yati nje ꞌdingini ngwüjï? Ila ꞌdi nyi enggaca ngwony ngwüny ngwanni ngwuca ngwe ombacinje, nga gwaꞌta be ädï ndi ru dartan düny.’
3 A dartan äbïngïnï giligoranu lüngün ngwari, ‘Nggwa be ärrï ange gwenene? Deleny düny dadiny be linynyi giyiiru. Äny gwaꞌti ätï yiima yidi gwürï, nyi ru daaru ndi geraci ngwüjü guy.
4 Nggwuma lenge nggwadi ärrï ange, nunnu manari deleny düny diminy linynyi giyiiru yüny giyee, nyi mbuji ngwumaada aar nyi ülläjälü ngwuꞌdun ngwegen.’
5 Ngwümäätä ngwurnidi ngwüjü ꞌdar ngwanni ngwümïnädï je deleny düngün dämjä nono. Ngwotacalu deꞌte gwerre gwerre ngwuci nu, ‘Deleny düny dïmïnädängä ümn nono?’
6 Ngwuci, ‘Dïmïnädïny yïbüngä nono yidi yila küüꞌrï tudini ꞌdübä’ (800).
A määtä a dartan ci, ‘Jalu apa nga je ülläjälü nga je ulli küüꞌrï tudini kwoꞌrongo’ (400).
7 Ngwoꞌre ngwuci deꞌte mana, ‘Nga gwümïnädängä ümn nono?’
Ngwuci, ‘Gwümïnädïny ngwubi nono ngwudi yon ngwüüꞌrï’ (1000).
Ngwuci, ‘Jalu apa nga je ülläjälü nga je ulli küüꞌrï tudini ꞌdübä’ (800).
8 Anni ma deleny ꞌdingini, ngwortada dartana ndoo diru dïrgïnä gwani bebere gwüngün gwanni gwuming ärrï. Ndi ari ngwüjï ngwudi dïdlä ndee ngwubeberana ngwüjï ngwudi Ngwaalu ndi ruyi yiiru yegen gïdïdlä degen.”
9 A no nggwa je ci, “Geꞌtar yimaada goola ge galu gidi dïdlä, ma ji mung medadi, nga mbuji ngwuꞌduna ngwudi gwurꞌtaling.
10 Gwanni gwati ru ligor leꞌte pu giyiꞌral yanni yooko guꞌru, gwa ru ligor leꞌte pu giyiꞌral yanni yipa guꞌru. A gwanni gwäꞌtüdï ligor leꞌte pu giyiꞌral yanni yooko guꞌru, gwaꞌti gwa ru ligor leꞌte pu giyiꞌral yanni yipa guꞌru.
11 Ma be ari nga lima ꞌti rüdï yigor yeꞌte pu ndi ruyi gola gidi dïdlä, yärü gwanni gwada je ätädä gola ganni giru ꞌdidanu?
12 A ma be ari ngaa lima ꞌti rüdï yigor yeꞌte pu ndi ombaci dïjü dere gola güngün ꞌdanggalu, a mine yärü gwuru gwanni gwa je ombaci gola galu?
13 Dïnäd daꞌti da ru dïnäd didi ngwoorta rom. Danni diru gu no, da ꞌdonya dorta deꞌte a ding ämnï deꞌte. Na ding ꞌdengenaci deꞌte a ding nyortacanu deꞌte. Ngaa laꞌti la apajidi yiiranu yidi Ngwaalu na yidi ngwüꞌrïny.”
14 Anni ma je Ngwübärrïjï ꞌdingini ꞌdar no, ngwanni ngwati ämnï ngwüꞌrïnyä aar määtä aar ci Yicungalu mireny.
15 A je Yicu ci nu, “Nga nga liru lati ci yigoꞌro yalu ngaa lijaw nono ngwäyänü ngwüjï, a be Ngwaalu ngwuru ngwülïngïdï yigor yalu. Ndi ari yanni yati je Dïjï engga yipa guꞌru ngwäyänü ngwüjï, yiru ꞌtur ngwäyänü Ngwaalu.”
Enggaci gwoko gwudi Yicu
16 A Yicu ari, “Ngwujaꞌri ngwudi Ngwaalu ngwanni ngwullu je Müjä na ngwanni ngwondaja je ngwïjïr ngwudi Ngwaalu ngwätï ngwäyänü ꞌtuꞌtu gaji nggoo ꞌdi gomon ganni gima ge Ngwaalu ükäjä Yuwanang Almamadan ngwujaꞌri ngwe ngwüngün ngwanni ngwujaw ngwani yeleny yidi Ngwaalu. Yima ündäjïnï kaji nggoo a ngwüjï ngwo ngwümïnä gay gadi aar ge änï giyelenyanu giyee.
17 A be nggwa ari yijana gito gito ndi ari a gere na dïyäng miꞌrinye ngwududi ndi ari a guuli geꞌte pu miꞌradalu gidi yobo yidi Ngwaalu.
18 Dur danni dati geꞌte dayu kay düngün ngwagu diꞌter, dati mïꞌrï ngwäyänü. Na dur danni dadi agu dayu danni digeꞌtaar kay, dati mïꞌrï ngwäyänü.”
Gur ganni gïnänü na Liyajir
19 “Gur geꞌte gïnänü gati genne ngwureda ngwanni ngwujaw ngwuꞌri ngwudi yeleny ati ngwarri yelenya giyomon ꞌdar.
20 Ati be gur geꞌte ganni giru diwayi gani Liyajir gümä ngwomboro ngwangina nono ꞌdar, ati aar apada ngwuꞌdun gwudi gur nggoo gïnänü ati ngwundralu gïlängïränü lüngün
21 ndi ari aading ütïnï ngwudagiꞌralu ngwanni ngwati miꞌriꞌtadalu gïdïmbürälä didi gur nggoo gïnänü, ati be manni yinyen ila aar münä ngwomboro nono ngwüngün.
22 A gaji ila a gur nggoo giru diwayi ayi, a yïꞌrr ape aar geꞌte aar ji Äbräyïm gwe giyelenyanu yidi Ngwaalu kerala. A gur nggoo gïnänü ayi ꞌto aar gatu.
23 Gidelanu didi yiꞌrany ngwuji giyiꞌrendeny, ngwüꞌdïꞌrïyï ngwäy ngwengga Äbräyïmïng ngwaalu ngwolanu gwujica Liyajiralu.
24 No ngwümäätä ngwurnidi Äbräyïmïng ngwuci, ‘Wä papa ngwüny gwani Äbräyïm, ïnädïny nyi ükäcä Liyajiring ngwurtiya ngwomon gwüngün giyaw ngwüllä aar nyi jabaji lingla, äny nggwo gïlïgänü gilee lïbüdïny yiꞌrendenya nono ꞌtiꞌtir.’
25 A määtä a Äbräyïm ci, ‘Gwani gïjï güny, diwayina ndi ari gwele gomon gunga gïdïdlä, nga gwumbuja yiꞌral yijaw, a je be Liyajir mbuji yanni yiki, a be gweneno nggwo be ndi jïlï nono nga nggwo be giyiꞌrendeny.
26 A mine yidi na ange giyee ꞌdar, gülä nggo gipa golanu güꞌrïdï njänü ndi ari gay gaꞌti gadi ge dïjï dambda ngene ꞌdänggärï na ngeno ꞌdanggalu.’
27 A gur nggo gïnänü ci Äbräyïmïng, ‘Gwani papa, nyi gwa ang päcälü ükäjä Liyajiring ꞌdunu ndi papa gwüny,
28 ndi ari äny gwätï ngwänggärï ngwuru tudini ngwuje girinyada ndi ari aaꞌti la ji lïꞌdädänü ndi ïꞌdï gïdïrbänü ꞌto didi yiꞌrendeny giyee yïbüdü.’
29 A Äbräyïm ci, ‘Ngindenga lätï yobo yanni yullu je Müjä na ngwïjïr ngwudi Ngwaalu ya girinya ngindeng je, a je ngwanggalu ꞌdingini.’
30 A gur nggo gïnänü ci, ‘Bärï papa gwüny gwani Äbräyïm, manari ꞌdogo a dïjï ꞌdïꞌrï giyiꞌranyanu ngwoꞌre ngwuje ondaca la joꞌrenyana giyiꞌral yanni yiki.’
31 A Äbräyïm ci, ‘Manari ngindenga lima ꞌti ꞌdengenaca yobo yidi Müjängä ngwïjïr ngwe ngwudi Ngwaalu, laꞌti la ꞌdingini manari a dïjï ꞌdïꞌrï giyiꞌranyanu ngwuje ondaci.’ ”