5
Ngwoꞌra ngwanni ngwurnidi ji Yicu gwerre
(Mätä 4.18–22; Murkuj 1.16–20)
1 Gomon geꞌte a Yicu ji ndi dünï kïmämü gidi gïbüng gani Jenjerad. A ngwüjï ngwonyadu ji ndi rükädä ꞌdünggün ndi ꞌdingini ngwujaꞌri ngwudi Ngwaalu.
2 A Yicu engga bälükä rom gwüdünäjänä ngwiina ngwudi ngwuum gïmämäng nono aar ji ndi uyi ngwüꞌdïbä nono.
3 A Yicu änï gïbälükänü gweꞌte gwudi Jamaan ngwuci nu, ngwuꞌdonggajalu gwooko kïmämü. A Yicu jalu gïbälükälä ngwenggaci ngwüjü ngwonyadu ngwujaꞌri ngwudi Ngwaalu.
4 Anni mung medaji ondacing ngwüjü, ngwube ci Jamaaning, “Ruya bälükä gweere giyaanu yanni yolanu ang gatu ngwüꞌdïbä nga umma ngwuuma.”
5 A Jamaan ci, “Gwani doorta, nyii lilandalu ngwülü ngwülü nyii ꞌti mätï gonyalu gere. A be anni ara gu, nggwa gatu ngwüꞌdïbä.”
6 Anni ma Jamaaninga ngwumaad ngwe ngwüngün gatu ngwüꞌdïbä giyaanu no, aar umma ngwuuma ngwonyadu ꞌdi aar ru ngwadi üꞌrïꞌtïyï ngwüꞌdïbänü.
7 A no, aar urnidi ngwoꞌra ngwanni ngwati aar ngwe acajidi ngwuꞌter aar je allici ngwuyala aar je ci ilar nje gendaci ngwuy. Aar onjaji ngwuuma bälükälä rom tüb ꞌdi ngwuru gwadi ïꞌdätï.
8 Anni ma Jamaan gwani Butruj engga ngwujaꞌri ngwee ngwüllï ngwüjürbälü yirku ye ngwuci Yicung nu, “Deleny, ꞌtüdï gïbälükänü äny gwuru dïjï diki!”
9 Ngindenga ꞌdar ngwumaad ngwe ngwüngün, a je le ngwaalu elalu ngwuum ngwonyadu ngwanni ngwuma aar je umma.
10 A Yagubinga Yuwana gwe, yïjï yidi Jäbädï lanni lati ele Jamaaninga le, a je le ngwaalu elalu ꞌto.
A Yicu ci Jamaaning nu, “Aaꞌti yedeny ya ang eny, komon gidi gweneng, nga gwa ru diina didi omma ngwüjü giyeleny yidi Ngwaalu.”
11 Aar oda ngwübälükä aar je gatani kïmämü aar gatani ngwony ꞌdar aar gwujani Yicung.
A Yicu uꞌriyi daamu nono
(Mätä 8.1–4; Murkuj 1.40–45)
12 Gomon geꞌte a Yicu ji kündär geꞌte, ngenone gur geꞌte giju gu gïmätï yaamu ngwangina nono ꞌdar. Anni mung engga Yicung ngwukwucalu yirku ye ngwurnidi ngwüpäcälü ngwuci nu, “Gwani Deleny, ma ang mïnï nga gwuny uꞌriyi nono.”
13 A Yicu dinga guy güngün ngwakani nono ngwuci, “Äny gwümïnä ang uꞌri nono.” No, a dümdï ꞌtü kur.
14 A Yicu girinya guru ngwuci, “Aaꞌti nga gwa ondaci dïjü dere. Ïndädï gidirꞌdal aar ang ombaji nono, nunnu ngwenggaci ngwüjü ndi ari nga gwuma uꞌri nono nga mïꞌrïnï nono anaku büpïnäär gu yobo ye yidi Müjä.”
15 Aꞌti yiꞌral yani Yicu badalu pad ngwüjï, a ngwüjï ngwonyadu ilada ndi Yicu ndi ꞌdingini ngwuje uꞌriyi nono gïdümdï degen.
16 Ating be aji ngwüꞌtü ngwele ngwaalu ngwanni ngwüjïnälü ating gu jalu ngenone ngwotaci Ngwaalingalu.
A Yicu uꞌriyi dimjo nono
(Mätä 9.1–8; Murkuj 2.1–12)
17 Gomon geꞌte anni ma Yicu ji ndi enggaci ngwüjü ngwujaꞌri ngwudi Ngwaalu, a Ngwübärrïjï na ngwoorta ngwudi yobo ngwïndï ngwuꞌdunanu ꞌdar ngwudi Jälïlïng, Yäwüdïyä na Üräjälïm, aar ji ndi jalu. A yiima yidi Deleny diru Ngwaalu ji ndi Yicu, ndi uꞌriyi ngwüjü nono ngwanni ngwümä.
18 A ngwüjï ngweꞌte apa guru giru dimjo gïlälä ge. Aar ru gadi aar ge änï gïdrü aar gïꞌtïjï Yicungalu.
19 A be anaku onyadu gu ngwüjï, aar ꞌti mbuju gay gadi aar ge änïjï gïdrü. No aar ape aar ge allu ngwuꞌdunala aar geꞌte gubuꞌru korrala aar dingada gïlälä ge ngwüllä gidiliganu ngwüjänü ngwonyadu ngwäyänü ndi Yicu.
20 Anni ma Yicu engga ndi ari ngindenga lätï ämnïng Ngwaalu gwupa, ngwuci guru nggoo giru dimjo nu, “Guru, lima ang düdänïjï keng gwunga.”
21 A Ngwübärrïjï ngwoortanga le ïrïyï ngwäyälü giyigoranu yegen aar ari, “Gur nggee gani yärü garu ngwulem ngwürïny ngwudi Ngwaalu! Ngwaalu ngwuru ngweꞌte pu ꞌdogo ngwanni ngwati düdänïjï ngwüjänü ndi ke gwegen!”
22 A je Yicu lenge yiꞌral yanni yiju giyigoranu yegen ngwuje ci nu, “Ange gwuru ngaa be ätï yiꞌral giyee giyigoranu yalu?
23 Yïndï ne yanni yojemana ndi ari, ‘Lima ang düdänïjï keng gwunga,’ na ndi ari, ‘ꞌDïꞌrälü ang ele’?
24 Nggwa je be enggaci ndi ari Gïjï gidi Dïjï dümnä gätï yelenya ngene gïdïyängälü ndi düdänïjï ngwüjänü ndi ke gwegen.” No a nginde ci guru nggoo giru dimjo nu, “Äny gwucanga ꞌdïꞌrälü ang ape gïlälälü gunga ang ele ꞌdunu!”
25 A gur ꞌdïꞌrä ngwüjü ngwäy prüd no, ngwape gïlälälü güngün ganni gating gu ndralu ngwele ꞌdunu, ngwortada Ngwaalingala.
26 A Ngwüjï ꞌdar a je ngwe ngwaalu elalu aar ortada Ngwaalinga, a yedeny onyadi giyigor yegen aarari, “Yiꞌral yiru ange giyee yima ar je engga gwene yiminje dibibiyi!”
A Yicu urnidi Lawing
(Mätä 9.9–13; Murkuj 2.13–17)
27 Anni ma yiꞌral medadi giyee a Yicu ꞌtü ngwele, ngwengga didulba dani Lawi ndi jalu ngwaalu gwudi uti dulba ngwuci nu, “Gwujaniny.”
28 A Lawi ꞌdïꞌrï ngwugatani ngwonyalu ꞌdar ngwugwujani Yicung.
29 A be Lawi gïꞌtïjï Yicung yïrnü yipa ꞌdunu ꞌdünggün a ngwüjï ji ngwonyadu ngwätïnä ngwudulbanu na ngwüjï ngwoko ngwuꞌter ji ꞌto ngwujalu.
30 A Ngwübärrïjï na ngwoorta ngwoko ngwegen ngwudi yobo ngwanni ngwati ji gwüpäng aar äbïngïnï giyinenanu aar otaci ngwoꞌralu ngwudi Yicu aar je ci, “Ange gwuru ngaa be emadi ndi eny na ndi ïyï ngwudulba ngwe na ngwüjï ngwanni ngwuki?”
31 A je Yicu ci nu, “Ngwüjï ngwanni ngwuꞌru nono ngwati ꞌti ïndädï gidima, lanni lümä liru lati ele gidima.
32 Äny gwaꞌti ïndädï ndi urnidi ngwüjü ngwanni ngwüdünälü nyi be ilada ngwüjï ngwanni ngwuki nunnu aar joꞌrenyana giyiꞌral yanni yiki.”
Määtä ngwädä
(Mätä 9.14–17; Murkuj 2.18–22)
33 A ngwüjï ngweꞌte ci nu, “Ngwooꞌra ngwudi Yuwana ngwati määtä ngwädä pïd pïd ati aar otaci Ngwaalingalu a ngwooꞌra ngwudi Ngwübärrïjï ꞌto. A mine ngwooꞌra ngwunga arra ati aar eny aar ïyï?”
34 A je Yicu ci nu, “Ngaa la gäbïcï ngwïrnü aar määtä ngwädä manari ngwujaar gurnga le ganni gadi ago?
35 A be gomon gaji gila ganni ga aar je ge apada la be määtä ngwädä giyomon giyoo.”
36 Ngwuje be mïꞌrïcï ngwujaꞌri ngwee, “Dïjï dere daꞌti dati üꞌrü direda danni diyang ngwugatada gidired danni duꞌrin. Mung je ärrï, gwa kiyi direda ndoo diyang na dired ndoo diyang daꞌti da aar elati dired de ndoo duꞌrin.
37 A ꞌto dïjï daꞌti dati bäläjï diꞌrica danni diyang gïdürädänü danni duꞌrin. Diꞌrica danni diyang da ubiyi dürädä da bälädälü a düräd da ke.
38 A be dïjï dati bäläjï diꞌrica danni diyang gïdürädänü danni diyang.
39 A be dïjï dere daꞌti dati mïnï ndi ïyï kaji geꞌte geꞌte diꞌrica danni diyang manari dïyü diꞌrica danni duꞌrin. Dati ari, ‘Diꞌrica danni duꞌrin dijayana.’ ”