42
Iob Iawe God gagalowa sipoasade
1 Tane osowe Iob Iawe God mampe wane wanase,
2 “Ne ateina nitu uduudu e dewamoa rua,
ita e dima insamoie dewasaiana
mai mida e enabodaepia rua.
3 E ne dianee waanase,
‘E ambi ne insaisana dewasadina bedewe
aiaa ipasiawaia mampe ne waitaraneiana?’
Ulaipa, ne dewa mai atenteipe gagalo diapanau di wamodine,
dewa debamau mai atenteapa rua, dia.
4 E ne dianee waanase,
‘E asisuneano gagalonteapa!
Ne waitaraepo ita e sipoanea.’
5 Bauta e umanaa apana ne dianeieno etedine,
tane tauma ne emanawoido e eweedina.
6 Sa baiwa ne gagalona uduudu wamodina malawantedina,
ita insaisana leusadina eueuwa
popokau ita isana bedewe wainedina.”
Iawe God osowe sau euda Iob wanede
7 Iawe God Iob mampe gagalo ema wamono aupe, me Elipas Teman apanawa mampe gagalolene wanase, “E ne umanana mai ulaipa mampe wapona ne nolana dewalala Iob dewaleidia rua. Sa baiwa ne nuana kadilen e ita sosoa nata do manlawo.
8 Sa baiwa e kau mona 7 ita sipsip mona 7 otamone ne nolana dewalala Iob mampe aitane pulo itune suna eba baila. Me e baila rauparilepi, ita dima ne dewasapa iririwaneampo e baila dewasapa. Ita ne mai e kadila dewasalana ruaidanteape matangelalepa. E ne umanana mai ulaipa wapona ne nolana dewalala Iob dewaleidia rua.”
9 Sa baiwa Elipas Teman apanawa, Bilda Sun apanawa ita Sopa Naamat apanawa Iawe God diamona rua dewasaiena. Ita Iob Iawe God iririsana rua mampo dewasan.
10 Iob sosowa baibu rauparileno dialeno aupe Iawe God maura wanen. Bauta nitu uduudu Iawe God wanena me osowesane do wanen.
11 Iob sosowa, tatatawa, weaweanapa ita apana uduudu mida me bauta atensaiena me duwa bedewe wimone me do nana naiena. Mo uduudu wimone me mampe nuapareu eueuwa dewasaiena. Ita Iawe God poka saiwa wanaubeno Iob mampe wisena gagalowa me wasausaiena. Ita mo deadea mane ita rin gold mampe dewalala me waneiena.
12 Iawe God Iob inawawa bauta eusan, tane inawawa ompeido eudidasan. Tauma Iob sipsipwa 14,000, kamelwa 6,000, kauwa 2,000 ita donkiwa iwoa 1,000.
13 Ita do me obampa mona uduudu 7 ita anoanopa natadea wanen.
14 Me anoopa tautuwa ebowa wane ituna Dimaima, tane anoopa wawea ebowa Kesia ita anoopa ompa ebowa wane ituna Keren-apua.
15 Tawo uduudu bedewe mai ioto da uwataubu Iob anoanopa rua waimoipona, dia. Tane Iob obampa mona ita iwoa diamona me bolepio aupe maurawa empuempusapuo ua 10 winapuo mo deadea otepu.
16 Me inalene aupe enawa 140 wain. Sa baiwa me enawa daumaia waine me obampa, ita obampa sedau oden alene nosi wadena ewamon.
17 Ita me gulauidalene bolen.