11
Maromak makoꞌan makaꞌas naꞌin rua
1 Hotu, sia lolo baa haꞌu ai sasukat naruk ida hanesan knoꞌan. Naꞌi Maromak moos naruka haꞌu naꞌak, “Yohanis, madeer ona! Baa sukat Haꞌukaan Uma Hamulak no hadak sera iha kota Yerusalem. O moos sura mola ema hotu-hotu mak namulak iha nia.
2 Mais, lalika sukat Uma Hamulak lalawar, tan fatin nia faꞌe tiꞌan, foo baa ema klubun seluk mak la natene Haꞌu. Sia atu sama nasobos Haꞌukaan kota moon, toꞌo fulan haat nulu resin rua laran (neꞌe mak, loron rihun ida, atus rua neen nulu).
3 Oras nia moos, Haꞌu ksolok Haꞌukaan ema naꞌin rua, nebee sia dadi Haꞌukaan makoꞌan iha nia. Sia atu natais hene metan susar, nodi dale Haꞌukaan lia, toꞌo loron rihun ida, atus rua neen nulu nia siku.”
4 Maromak makoꞌan Sakaria nakerek kedan hori uluk nosi makoꞌan naꞌin rua nia. Nia natetek nodi ai saitun huun rua, no badut sasukun rua mak nariik seꞌi oin baa Maromak mak dadi Naꞌin baa ema raiklaran hotu-hotu.
5 Kalo ema beer naseꞌi dinu baa Maromak makoꞌan naꞌin rua neꞌe, haꞌi atu sai nosi makoꞌan siakaan ibun, namotu sia hotu-hotu. Hodi nunia, sia nanis mate.
6 Baa oras nia moos, Naꞌi Maromak latan beran baa makoꞌan naꞌin rua nia atu sena udan. Nia moos latan beran atu nalo wee matan dadi raa, no beran atu nodi susar oi-oik baa raiklaran neꞌe, tuir siakaan hakara dei.
7 Siakaan loron serwisu siku tiꞌan, buat fuik kasalak matan ida atu sai nosi kuak boot mak la noo nidin nia. Nia atu natuda sakar sia, toꞌo natoba nola, no noꞌo sia.
8-9 Hodi nunia, sia mate iha kota boot ida. Uluk ema noꞌo siakaan Maromak baa ai karuus iha kota nia. Kota nia dadi baa kota aat tiꞌan, hanesan Sodom no Mesir baa otas uluk. Oras makoꞌan rua nia mate, ema soe lerek siakaan maten iha dalan tehen. Hotu, ema nosi klubun hotu-hotu, ema nosi hunun hotu-hotu, no ema mak dale nodi lia hotu-hotu nosi rai hotu-hotu mai nobun maten rua nia, toꞌo loron tolu no balun laran. Sia nakahik ema nakoi maten rua nia,
10 tan sia beer basuk nobun maten rua nia. Tan uluk, ema rua nia nasusar ema hotu-hotu iha raiklaran. Dadi, ema nadahur bele-bele maten nia sia, nodi foo parsen baa malu.
11 Mais, loron tolu no balun nia siku tiꞌan, Naꞌi Maromak foo nikar nawan baa makoꞌan rua nia, nebee sia moris nikar. Ema hotu-hotu mak naree sia, kiki mate.
12 Hotu, makoꞌan rua nia atu rona lia maliak makaꞌas ida nosi laleꞌan, naruka sia naꞌak, “Hei! Saꞌe mai ona!” Sia moos niꞌit aan saꞌe baa laleꞌan no kaloꞌan nakalus nola sia. Naree nunia, siakaan funu sia ibun nakaka loos.
13 Sarebak, kakekuk boot moris. Uma moos nakroꞌon. Kalo sura uma hotu-hotu iha kota nia, halo baa faꞌek sanulu, faꞌek ida nakroꞌon. Ema naꞌin rihun hitu moos mate. Ema mak la mate, nataꞌuk tebe-tebes. Hotu, sia foo kneter baa Naꞌi Maromak, tan Nia mak kaer ukun iha laleꞌan.
14 Hodi nunia, dinu nomer rua liu tiꞌan. Mais sintidu, tan dinu nomer tolu sei iha ikus.
Huu kfui dikur nomer hitu, Naꞌi Maromak no Yesus Kristus kaer ukun iha raiklaran
15 Nunia hotu, makbukar laleꞌan nomer hitu nuu niakaan kfui dikur. Sarebak, haꞌu krona kola lia maliak waꞌin mai bele-bele nosi laleꞌan naꞌak,
“Oras neꞌe, itakaan Naꞌi Maromak
no Kristus mak Nia boi kedan hori uluk,
mak kaer ukun hotu-hotu iha raiklaran.
Nia atu kaer ukun hanesan Naꞌin, toꞌo nima-nimak.”
16 Iha nia moos, fukun naꞌin rua nulu resin haat mak tuur iha siakaan kadera ukun iha Naꞌi Maromak oin. Sia moos rona lia maliak nia sia. Hotu, sia nakniꞌa nodi sudur, hotu tonu-naboot Naꞌi Maromak
17 naꞌak,
“Aaa, Naꞌi Maromak!
Amikaan Naꞌi!
Amikaan Maromak!
Ita Boot mak ukun hotu-hotu.
Ita Boot mak kaer beran baa hotu-hotu.
Ita Boot mak moris hori uluk aan.
Ita Boot mak moris baa oras neꞌe.
Ami sera dodan baa Ita Boot,
tan Ita hodi beran boot,
kaer ukun iha raiklaran.
18 Ema klubun seluk sia krakat,
tan la noꞌuk tuir Ita Boot.
Oras neꞌe, Ita Boot moos hahibu,
tan sia la noꞌuk natene Ita Boot.
Oras neꞌe, Ita Boot oras toꞌo tiꞌan,
atu kastikar sia mak la noꞌuk titu Ita Boot.
Oras neꞌe, Ita Boot oras toꞌo tiꞌan,
atu nadodok sia mak nadodok ema seluk.
Oras neꞌe, Ita Boot oras toꞌo tiꞌan,
atu hakotu lia bodik ema mak mate tiꞌan.
Oras neꞌe, Ita Boot oras toꞌo tiꞌan,
atu selu ata kolen.
Neꞌe mak, Ita Boot makoꞌan sia,
no Itakaan ema sia,
kiꞌik-boot, matas-lawarik.
Ita Boot atu selu baa ema hotu-hotu,
mak foo kneter baa Ita Boot.”
19 Tonu-naboot hotu, haꞌu ktitu-karee Naꞌi Maromak Niakaan Uma Hamulak iha laleꞌan. Odamatan nakloke tiꞌan. Haꞌu moos titu-karee ai balun, mak uluk sia nodi nahulin Naꞌi Maromak Ukun Sanulu, mak hakerek iha fatuk. Mameran moos taba tutan malu baa-mai. Kokur botu makaꞌas simu malu. Raiklaran nawae no udan fatuk boot nakfakar nosi laleꞌan.