12
Samea inan natuda sakar feto no oan
1 Nunia hotu, sarebak haꞌu ktitu-karee tadak kasalak ida mosu iha laleꞌan. Ema raiklaran sei la dala ida dauk naree tadak oin nunia. Haꞌu karee feto ida, loro nakalus nola. Nia rai ain baa fulan. Nia tau sabeo mahoo fitun matan sanulu resin rua.
2 Nia moos koꞌus. Nia noꞌi tanis, tan moras atu nahoris.
3 Sarebak, haꞌu ktitu-karee tenik tadak kasalak seluk. Samea inan mean boot ida mosu iha laleꞌan. Nia ulun hitu, dikur sanulu. Nia tau sabeo naꞌin baa ulun hitu nia sia.
4 Nodi ikun saar namoos fitun nia sia, toꞌo nalakon faꞌek ida nosi faꞌek tolu iha laleꞌan. Hotu, samea inan nia leꞌak fitun nia sia baa raiklaran. Hotu, nia baa nariik seꞌi oin baa feto nia, atu nein toꞌo nahoris, tan atu folan nola kedas oan nia.
5 Hotu, feto nia nahoris nola oan mane ida. Mais Maromak Niakaan makbukar laleꞌan ida mai nadau nola, nodi baa Naꞌi Maromak, nebee oan nia kaer ukun namutuk no Nia iha laleꞌan. Oan nia atu ukun ema klubun hotu-hotu iha raiklaran nodi beran mak boot kaliuk.
6 Hotu, feto nia moos nalai baa fatin mamuk ida mak Naꞌi Maromak nadiꞌa tiꞌan bodik nia. Hotu, naliku nia iha nia toꞌo tinan tolu no balun (neꞌe naꞌak, loron rihun ida atus rua neen nulu).
Mikael natuda sakar samea inan iha laleꞌan
7 Hotu, hatuda boot moris iha laleꞌan. Noo Maromak Niakaan makbukar laleꞌan siakaan meo ulun ida, naran Mikael. Mikael no maktuir sia natuda sakar samea inan nia no niakaan maktuir sia.
8 Toꞌo ikus, Mikael sia natoba nola samea inan nia no niakaan maktuir sia. Mikael sia nakahik, nebee keta nein iha laleꞌan tenik.
9 Hotu, teꞌur sai sia nosi laleꞌan, soe lakon baa raiklaran. Hanono! Samea inan nia, mak diabu ulun. Hori uluk aan, nia mak tolek nola ema raiklaran monu baa sala.
10 Nunia hotu, haꞌu krona tenik lia maliak makaꞌas ida nosi laleꞌan naꞌak,
“Uluk, samea inan nia nariik iha Naꞌi Maromak oin,
nodi tula sala bei-beik baa itakaan mamaluk makfiar sia.
Oras neꞌe, nia kona soe sai nosi laleꞌan tiꞌan.
Oras neꞌe, Naꞌi Maromak oras toꞌo tiꞌan, atu sori ema raiklaran.
Oras neꞌe, Naꞌi Maromak kaer ukun tiꞌan nodi beran boot.
Nia moos foti Kristus tiꞌan,
Ema nia mak Nia boi kedan atu dadi Naꞌin bodik ema klubun hotu-hotu.
11 Itakaan mamaluk sia natoba nola samea inan nia mak uluk tula sala baa sia,
tan Bibi Malae Oan raan nakduar tiꞌan, bodik kasu siakaan salan.
Sia moos natoba nola nia,
tan sia naberan aan keke lema Naꞌi Maromak Manfatin.
Masik ema krakat atu noꞌo sia moos,
sia la nataꞌuk.
12 Tan lia nia, emi hotu-hotu iha laleꞌan musti neon diꞌak!
Mais emi hotu-hotu iha raiklaran musti neon susar, tan dinu atu kona emi.
Diabu ulun tuun mai baa emi tiꞌan.
Nia krakat basuk,
tan nia natene naꞌak, niakaan oras nalo aat atu mohu ona!”
Samea inan buka feto nia iha raiklaran
13 Baa oras nia, samea inan nia natene naꞌak, nia kona soe baa raiklaran tiꞌan. Hotu, nia baa buka feto mak nahoris Oan nia, atu nasusar nia.
14 Mais feto nia netan liras rua, hanesan kikit liras, nebee semo baa nakfunin iha fatin fuik mak dook nosi samea nia. Iha nia, ema naliku feto nia, toꞌo tinan tolu no balun.
15 Titu-naree nunia, samea krakat, hotu nakbuut sai wee hanesan motasaꞌe, atu lulun nodi feto nia.
16 Mais raiklaran tulun feto nia. Rai nakloke, nodi folan mohu wee mak sai nosi samea nunun, nebee wee keta toꞌo feto nia.
17 Hotu, samea krakat basuk baa feto nia. Nia sai atu baa natuda sakar feto niakaan oan seluk sia. Sia neꞌe, ema mak tuir Naꞌi Maromak ukun, nodi keke lema nohuun Naꞌi Yesus Manfatin Diꞌak.
18 Nunia hotu, samea nia baa nariik iha tasi tehen, nodi ruun neꞌan.