19
Klibur boot nananu iha laleꞌan
1 Makbukar laleꞌan nia dale notu nunia, haꞌu moos rona kola lia maliak boot, hanesan klibur boot noꞌi nananu iha laleꞌan. Sia nananu naꞌak,
“Aleluya! Aleluya!
Ami tonu amikaan Maromak, tan Nia mak boot kaliuk.
Aleluya! Aleluya!
Naꞌi Maromak mak sori ami
nosi amikaan salan.
Naꞌi Maromak mak nahulin ami
nosi amikaan aꞌaat.
2 Ami tonu amikaan Maromak,
tan Nia mak nakotu lia nodi moon.
Ami tonu amikaan Maromak,
tan Nia taa ukun nalo makonak.
Naꞌi Maromak taa ukun baa feto dalan aat nia,
tan nia seten ema iha raiklaran,
atu tuir niakaan aꞌaat.
Naꞌi Maromak selu nikar baa feto aat nia,
tan nia noꞌo hei-hein
Naꞌi Maromak Niakaan ema sia.”
3 Hotu, sia nananu tenik kananuk ida seluk naꞌak,
“Aleluya! Tonu-haboot Naꞌi Maromak!
Aleluya! Foti-hahaas Niakaan naran!
Tan dubun nosi haꞌi mak namotu feto nia maten,
saꞌe bei-beik la nanawa.
Tan dubun nosi haꞌi mak sunu kota boot nia,
saꞌe bei-beik la nakotu.”
4 Nunia hotu, katuas naꞌin rua nulu resin haat no buat horis kasalak matan haat nia, nakniꞌa loꞌu-sudur seꞌi oin baa Naꞌi Maromak habesi aan fatin. Sia nakneter Nia nodi dale naꞌak,
“Tebes! Mai ita tonu-haboot Naꞌi Maromak!
Aleluya! Mai ita foti-hahaas Niakaan naran!”
Dahur bodik Bibi Malae Oan no sasudin iha laleꞌan
5 Hotu, haꞌu krona kola lia maliak ida tenik mai nosi habesi aan fatin nia naꞌak,
“Hei, Maromak ain-liman hotu-hotu!
Hei, Maromak eman hotu-hotu!
Mai foti-hahaas Niakaan naran.
Kiꞌik-boot, matas-lawarik, mai tonu Nia.”
6 Hotu, haꞌu krona kola hanesan ema lear dale baa malu. Siakaan lian, maliak boot hanesan wee tatolik, no makaꞌas hanesan kokur. Sia dale naꞌak,
“Aleluya! Ami tonu-haboot Naꞌi Maromak.
Aleluya! Ami foti-hahaas Niakaan naran.
Nia mak beran kaliuk.
Nia mak ukun hotu-hotu.
7 Oras neꞌe, itakaan neon diꞌak tiꞌan.
Oras neꞌe, itakaan neon boot tiꞌan.
Ita tonu-haboot Nia.
Tan dahur bodik Bibi Malae Oan toꞌo tiꞌan.
Ita foti-hahaas Niakaan naran.
Tan Bibi Malae Oan sasudin feto nadiꞌa aan tiꞌan.
8 Naꞌi Maromak natais tais mamar baa sasudin nia.
Naꞌi Maromak natais tais mutin molen baa sasudin nia.”
(Tais mutin molen mak Naꞌi Maromak natais sasudin feto nia, neꞌe mak, Niakaan ema siakaan hahalok diꞌak.)
9 Hotu, makbukar laleꞌan nia moos katak baa haꞌu naꞌak, “Yohanis! O musti makerek nuneꞌe:
‘Naꞌi Maromak atu nalo dahur bodik Bibi Malae Oan no Niakaan sasudin. Ema hotu-hotu mak kona hamata, sotir tebes!’ ”
Hotu, makbukar nia dale natutan tenik naꞌak, “Naꞌi Maromak Manfatin neꞌe, tebes no loos!”
10 Haꞌu moos kakniꞌa atu kloꞌu-sudur baa makbukar laleꞌan nia. Mais nia deꞌan haꞌu naꞌak, “O keta malo nunia! Tan haꞌu moos Maromak atan hanesan o mo okaan mamaluk sia mak keke lema Yesus hanorin. Yesus hanorin nia, manesak no hanorin mak uluk Maromak foo baa Niakaan makoꞌan sia. Tan baa nia, keta loꞌu-sudur baa haꞌu. Loꞌu-sudur baa Naꞌi Maromak dei!”
Naꞌi Yesus mai saꞌe kuda mutik
11 Hotu, haꞌu kfoti oin, haꞌu ktitu-karee laleꞌan nakloke. Sarebak, karee kuda mutik matan ida nariik iha nia. Noo ema ida saꞌe kuda nia. Ema nia naran, “Ema Mak Kaer Metin Mamenon” no “Ema Mak Tebes no Loos”. Ema nia, oras nakotu lia, nia nakotu nalo loos. Oras baa natuda, nia baa nodi neon moon.
12 Matan laka nuꞌu haꞌi. Tau sabeo naꞌin lear iha ulun. Naran hakerek iha isin, mais nia naꞌin duꞌuk mak natene naran nia isin.
13 Niakaan tais, loban baa raa tiꞌan. Ema temi Nia naꞌak, “Maromak Manfatin”.
14 Hotu, haꞌu karee sondadu laleꞌan sia saꞌe kuda mutik atu tuir Nia. Sondadu sia hotu-hotu moos tau tais mamar mutin molen.
15 Surik roꞌat ida naklosu sai nosi ema nia ibun. Nia nodi surik nia, baa natuda sakar ema klubun hotu-hotu iha raiklaran, toꞌo natoba nola sia. Hotu nia atu ukun sia nodi meik no roꞌat, toꞌo sia moos noran hahibun nosi Naꞌi Maromak mak beran kaliuk. Naꞌi Maromak hahibun nia, hatetek baa lia ema sama hei-hein anggor fuan atu nasai ween.
16 Iha Ema nia tais no kelen, noo hakerek nuneꞌe:
Naꞌin baa naꞌi hotu-hotu,
Ulun baa ulun hotu-hotu.
Yesus natoba nola buat krakat aat no niakaan maktuir sia
17 Hotu, haꞌu ktitu-karee makbukar laleꞌan ida nariik iha loro matan leten. Nia bolu kawaa hotu-hotu mak semo iha laleꞌan naꞌak, “Mai libur malu hotu-hotu iha neꞌe ona! Mai haa Naꞌi Maromak dahur boot!
18 Mai haa ema maten naꞌan! Haa naꞌin no meo ulun naꞌan. Haa sondadu naꞌan. Haa kuda no maksaꞌe kuda naꞌan. Haa ema kiꞌik-boot naꞌan. Haa ata no ulun naꞌan. Badak dei, mai haa ema maten hotu-hotu naꞌan.”
19 Hotu, haꞌu ktitu-karee buat krakat aat mak uluk sai nosi tasi nia. Buat nia kabuar lia no naꞌi hotu-hotu iha raiklaran. Hotu, sia no siakaan sondadu sia baa natuda sakar ema maksaꞌe kuda mutik nia, no niakaan sondadu laleꞌan sia.
20 Mais, ema maksaꞌe kuda mutik nia, kohi nola buat nia no niakaan makoꞌan tolek teen nia. Uluk, makoꞌan nia nalo tadak blaar oi-oik nodi tolek ema, nebee simu niakaan marak no loꞌu baa niakaan aiꞌoik. Mais, oras neꞌe, ema maksaꞌe kuda mutik nia, leꞌak lerek buat krakat aat nia no niakaan makoꞌan baa haꞌi tasi fatuk lobot mak laka la nakotu.
21 Hotu, ema maksaꞌe kuda mutik nia, noꞌo sondadu seluk sia nodi surik mak naklosu sai nosi ibun. Hotu, kawaa sia mai naa mohu maten nia sia hotu-hotu.