28
1 Ñayiu saꞌa jakueꞌe, chi jino yuꞌi, visi tu na in sondikin ña jin.
Su ñayiu ndaa, chi kukanu ini ja oo guaꞌi na kuinio in ndikaꞌa.
2 Nuu ka jaxin tnaꞌa kuaꞌa ñayiu in ñuu, chi ka kaya kuaꞌa tee ka tatnuni.
Su nuu oo in tee ndichi ja tatnuni guaꞌa de, chi oo guaꞌa ñuu yun.
3 Tee kueꞌe ja saꞌa ndevaꞌa de jin ñayiu ka kundaꞌu,
kuu de na kuinio in sau xeen ndevaꞌa ja xnaa ndiꞌi ja ka jitu ñayiu nuu ñundeꞌi.
4 Ñayiu xndendoo Ley, chi saꞌa kaꞌnui ñayiu kueꞌe.
Su ñayiu jantnoꞌo Ley, chi nduku ndei siki ñayiu kueꞌe yun.
5 Ñayiu kueꞌe, chi tu ka jinkuiꞌnu saꞌun ini ja vi saꞌa ndai.
Su ñayiu ndanduku Jitoꞌo, chi ndiꞌi ni ja jinkuiꞌnu ini.
6 Guaꞌa ka kuu ja kokuu ndaꞌuo, su kokuo ñayiu ndaa,
masu ja kokuo ñayiu kuika, te kokakao ichi kueꞌe.
7 Ñayiu tavaꞌa Ley ia Dios, chi seꞌe jinkuiꞌnu ini kui.
Su suchi ndeka tnaꞌa jin ñayiu ka jaa ndeꞌe ndevaꞌa, chi jiñaꞌi jakanoo tatai.
8 Ñayiu tatutu kuaꞌa ja kuika nevaꞌi nuu jikain kuaꞌa seꞌe xuꞌun,
te tatutui ja kokuu jin ñayiu kaꞌan ndaꞌu ña jin ñayiu ka kuu ndaꞌu.
9 Ñayiu tu kuini ja konini Ley ia Dios,
te suni skexiko ia Dios tnoꞌo kaꞌin nuu ndakuatui.
10 Ñayiu jaka ña jin ñayiu ndaa nuu ichi kueꞌe, chi nanakau mai nuu jakueꞌe saꞌi yun.
Su ñayiu tu saꞌa jakueꞌe, chi niꞌi taꞌu mai jaguaꞌa.
11 Ñayiu kuika, chi kaꞌin ja ñayiu ndichi ndevaꞌa kui.
Su ñayiu kundaꞌu ja jinkuiꞌnu ini, chi skuaꞌa guaguaꞌi naxa oo ñayiu kuika yun.
12 Nuu ka kundee ñayiu ndaa, te ka saꞌa ñayiu in viko kaꞌnu.
Su nuu ka kundee ñayiu kueꞌe, te ndiꞌi ñayiu ka tayuꞌu nuu.
13 Ñayiu tayuꞌu yika kuechi, chi ma kee guaꞌi.
Su ñayiu naꞌma yika kuechi, te xndendoi jakueꞌe yun,
chi niꞌi ja konekaꞌnu ini ia Dios ja ni saꞌi.
14 Na taꞌu na ndetu ñayiu siun ni yuꞌu niꞌnui ia Dios.
Su ñayiu saꞌa ndee ini, chi junkau mai nuu jakueꞌe.
15 Tee kueꞌe ja tatnuni in ñuu ndaꞌu,
kuu de na kuinio in ndikaꞌa ja kañu xeen ti,
axi na kuinio in oso ja kokin ndevaꞌa ti.
16 Tee tatnuni ja tu jini nagua kuu,
chi jikan de kuaꞌa ka xuꞌun nuu ñayiu.
Su tee tu ndioo ini ja kuu kuika de,
chi koteku de kuakuaꞌa kuia.
17 Ñayiu jaꞌni ndiyi, chi vi sondikin ña jin,
te kokunu yuꞌu mai, guaa ndee kiuu kui,
te ni in ñayiu, ma vi nduku ja vi chituu ña jin.
18 Ñayiu jika ndaa, chi kaku niꞌnui nuu jakueꞌe.
Su ñayiu jika ichi kueꞌe, chi kanakau mai nuu jakueꞌe yun.
19 Ñayiu jitu nuu ñundeꞌi, chi vi suaꞌa kendoo sagua ja kai.
Su ñayiu ndikin ña jin ñayiu kuꞌndu, chi kokuu ndaꞌu ndevaꞌi.
20 Ñayiu ndaa, chi niꞌi kuaꞌa javii javaꞌa nuu ia Dios.
Su ñayiu ndioo ini ja kuu kuikai, ma kakui, chi tniuyaꞌu mai jin ja saꞌi yun.
21 Masu guaꞌa kuu ja kosaꞌa sion in in ñayiu,
chi vi ndee jin in yuꞌu xtaa, te kuu junkuei ñayiu nuu yika kuechi.
22 Ñayiu xii nuu, chi ndioo ndevaꞌa ini ja kuu kuikai,
te ni tu jini ja vaji ja kokuu ndaꞌui.
23 Ñayiu kuxeen nuu inka ñayiu, chi sandiꞌi te vi kaꞌan vaꞌa ka ña jin,
saa ñayiu kaꞌan luu ndevaꞌa jin inka ñayiu yun ja xndaꞌu ñai.
24 Ñayiu suꞌu tatai axi nanai, te kaꞌin ja masu yika kuechi kuu,
chi tnaꞌa ñayiu ka jaꞌni ndiyi kui.
25 Ñayiu ndioo ndevaꞌa ini ja kuika oo ñuyiu, chi skaxin tnaꞌi ñayiu.
Su ñayiu kukanu ini Jitoꞌo, chi kee guaꞌi.
26 Ñayiu kukanu ini mai, chi in ñayiu vasa kui.
Su ñayiu jika jin tnoꞌo ndichi, chi kakui nuu tnundoꞌo.
27 Ñayiu chituu ña jin ñayiu ka kundaꞌu, chi ma kuni ja kokundaꞌui.
Su ñayiu tu kuini ja chituu ña, chi kuaꞌa ñayiu vi xtau tniaꞌa ña jin.
28 Nuu ka kundee ñayiu kueꞌe, te ndiꞌi ñayiu ka tayuꞌu nuu.
Su nuu ka naa ñayiu kueꞌe, te ka ndakaya ñayiu ndaa.