29
1 Ñayiu saꞌa ndee ini nuu ka kuxeen nui, vi sanaa ni te nai,
te tu na tatna ja kakui.
2 Nuu ka tatnuni ñayiu ndaa, te ka kusii ini ñayiu ñuu.
Su nuu ka tatnuni ñayiu kueꞌe, te ka tnana ndaꞌu ñayiu ñuu ja ka tnaꞌi tnundoꞌo.
3 Nuu kutoo in suchi ja koi jin tnoꞌo ndichi, te jiñaꞌi jasii ini nuu tatai.
Su suchi jika jin ñaꞌa ka xiko maa, chi xnai xuꞌun nevaꞌi.
4 Rey ja saꞌa ndaa, chi saꞌa de ja oo yutnu ñuu de.
Su rey ja jikan kuaꞌa xuꞌun impuestu, chi skunaa de ñuu de.
5 Ñayiu kaꞌan luu ndevaꞌa jin tnaꞌi ja xndaꞌu ñai,
chi saꞌi ja na kanakau ñayiu yun nuu jakueꞌe.
6 Ñayiu kueꞌe, chi nanakau mai nuu yika kuechi.
Su ñayiu ndaa, chi jitai ja kusii ini.
7 Ñayiu ndaa, chi jini ja saꞌa ndai ja jaꞌa ñayiu ka kundaꞌu.
Su ñayiu kueꞌe, chi ni ja tu ndiꞌni.
8 Ñayiu ka saꞌa kuasun sava ka ñayiu, chi skiti ini ñayiu ñuu.
Su ñayiu ndichi, chi ka jini naxa vi saꞌi ja vi yaꞌa ini ñayiu jin ja kiti ini yun.
9 Nuu ja in ñayiu ndichi na vi skiti ini tnaꞌa jin in ñayiu vasa,
te visi na kiti ini axi na kuakui, su tu saꞌun nagua kuu saꞌi ja yaꞌa ja kiti ini yun.
10 Tee ka jaꞌni ndiyi, chi ka skexiko de ñayiu tu na kuechi.
Su ñayiu ndaa, chi ka ndukui ja vi skaku niꞌnui ñayiu tu na kuechi yun.
11 Ñayiu vasa, chi jandetui nani guaa saꞌi nuu kiti ini.
Su ñayiu ndichi, chi kundei jaꞌnu niꞌnui mai.
12 Nuu ja in tee tatnuni nini tnoꞌo tnoꞌo ka ndakani ñayiu,
nuu saa te ndiꞌi ñayiu ka netniuu jin de, ka ndui ñayiu kueꞌe.
13 Kintnaꞌa inuu ni ñayiu kundaꞌu jin ñayiu jikan kuaꞌa seꞌe xuꞌun,
chi maa Jitoꞌo ni jiñaꞌa ja ka teku nduu ñayiu yun.
14 Rey ja saꞌa ndaa ja jaꞌa ñayiu ka kundaꞌu
saꞌa de ja siun ni koyutnu nuu tatnuni de.
15 Nuu ka kani ña vi ka kuxeen nuu in suchi kueli, chi kuu ndichi.
Su seꞌe ja ka jandetu ja saꞌi nagua kuini mai, chi jiñaꞌi jakanoo nuu nanai.
16 Nuu ka kaya ñayiu kueꞌe, te ka kaya kuaꞌa yika kuechi.
Su ñayiu ndaa, chi vi kuni nui ja vi skunaa ñayiu yun.
17 Ndakanu ichi ndaa ni seꞌe ni,
te ndatatu anu ni vi kosii ini ni.
18 Nuu ja tu na ñayiu skuni ña ia Dios naxa kokuu,
te yaꞌa yun ni ja ka saꞌa ñayiu ñuu.
Su na taꞌu na ndetu ñayiu skunkuu Ley ia Dios.
19 In tee jinokuechi, chi ma nukuiin ichi ndaa de jin suaꞌa ni tnoꞌo kaꞌon,
chi visi jinkuiꞌnu ini de, su tu kuini de kuantnoꞌo de.
20 ¿A jini ron in tee ja ñama kaꞌan de, te tu ndakani guaꞌa ini de?
Te kondetu kaꞌnu kao nuu in tee vasa saa nuu tee yun.
21 Ñayiu kaꞌan luu ndevaꞌa jin in suchi jinokuechi ndee luluu suchi yun,
te sandiꞌi te kindee ja saꞌa jajin ja nevaꞌa lamui.
22 Ñayiu yachi ndevaꞌa ini, chi jaxin tnaꞌi jin ñayiu,
te ñayiu kiti ini, chi kuaꞌa yika kuechi saꞌi.
23 Ñayiu saꞌa teyii mai, chi kee ndaꞌui,
te ñayiu saꞌa ndaꞌu saꞌa kee ni, chi koo jayiñuꞌu nui.
24 Ñayiu yitu tnaꞌa jin kuiꞌna, chi saꞌa kueꞌi mai,
chi visi ja oi ja xtuu ñai, su ma ndakani.
25 Ja yuꞌu ñayiu inka ñayiu kuu na kuinio in ja skanakau ña jin.
Su ñayiu kukanu ini Jitoꞌo, chi koo guaꞌi.
26 Kuaꞌa ñayiu ka nduku ja na chindee chituu ña tee tatnuni.
Su maintnoꞌo maa Jitoꞌo guaa saꞌa ndaa ya ja jaꞌa in in ñayiu.
27 Ñayiu ndaa, chi ka skexikoi ñayiu ka saꞌa jakueꞌe.
Su ñayiu kueꞌe, chi ka skexikoi ñayiu ka jika ndaa.